Аудан әкімі Наурызбай Қарағойшин аудан намысын қорғап жүрген бір топ спортшыларды қабылдады. Жиынды ашып сөз алған аудан әкімі Н.Қадырбайұлы спорт пен мәдениеттің ел атағын шығаруда алатын рөлі зоры екендігін тілге тиек ете отырып, ауданның мерейін асқақтатқан спортшыларға алғыс білдірді. Соның ішінде самбо күресінен Сербия елінде өткен әлем чемпионатында күміс жүлдегер атанып, ауданның, облыстың ғана емес, бүкіл қазақ елінің атағын әлемге паш еткен жерлесіміз Бақыт Ерасыл Шерниязұлының ерлігін жас буынға үлгі ете отырып, ерекше ризашылығын білдірді.

Ауданымызда Елбасының «Болашаққа бағдар: рухани жаңғыру» мақаласында көрсетілген міндеттерді орындау мақсатында «Ауылға жол» жобасы жүзеге асуда. Осыған орай аудандық мәслихат хатшысы Закария Сисенғали бастаған топ Жаңақазан, Мәстексай, Жаңажол, Көпжасар ауылдық округінде болды. 

Ағымдағы жылдың 18 қазанында «Рухани орталық» мәжіліс залында латын әліпбиіне көшу мәселесі турасында ғалымдардың қатысуымен отырыс болып өтті. Аталған жиынға Батыс Қазақстан инновациялық-технологиялық университетінің профессоры, филология ғылымдарының докторы Сабыр Мұрат Бөкенбайұлы, М.Өтемісов атындағы Батыс Қазақстан мемлекеттік университетінің доценті, филология ғылымдарының кандидаты Аронов Құспан Ғұмарұлы, PhD докторант, М.Өтемісов атындағы Батыс Қазақстан мемлекеттік университетінің аға оқытушысы Ақболатов Айдарбек Ахметұлы, Батыс Қазақстан облыстық тілдерді дамыту басқармасының бөлім басшысы Әлжанова Гүлнәр Жәрдемқызы қатысып, рухани жаңғыру бағдарламасына сәйкес латын әліпбиіне көшу мәселесі болашақ үшін жасалатын жауапты қадамдардың бірі, латын әліпбиіне көшу заман талабы, елдік деңгейдегі ұлттық мәселе екенін жан-жақты талдай отырып, үгіт-насихат жұмысын жүргізді.

Мемлекет басшысы Нұрсұлтан Назарбаев «Болашаққа бағдар: рухани жаңғыру» мақаласында елімізге еңбек еткен азаматтарды ұмытпай, қадірлеуіміз қажет екенін жазған болатын. Әкелер жүріп өткен жол мен бүгінгі тәуелсіздікке қол жеткізген заман бір тұтас тарих. Ендеше алдыңғы толқынның есімін болашақ ұрпақ ұмытпауы керек. Бұл бағытта өткен аптада аудан экономикасының дамуына сүбелі үлес қосқан, белгілі еңбек ардагері Аққазиев Қыду Сатыбайұлының тұрған үйіне ескерткіш тақта орнатылды.

Қайырымдылық айлығына орай аудан әкімдігінің кіші мәжіліс залында аудандық жұмыспен қамту және әлеуметтік бағдарламалар бөлімінің ұйымдастыруымен аудан әкімі Н.Қарағойшин бір топ ақ сақалды аталар мен ақ жаулықты әжелерді, мүмкіндігі шектеулі жандарды арнайы қабылдап, құрмет көрсетті.

«Болашаққа бағдар: рухани жаңғыру» атты мақаласында Елбасы: «Қазақ тілін біртіндеп латын әліпбиіне көшіру жұмыстарын бастауымыз керек. Біз бұл мәселеге неғұрлым дәйектілік қажеттігін терең түсініп, байыппен қарап келеміз және оған кірісуге Тәуелсіздік алғаннан бері мұқият дайындалдық. Яғни, 2025 жылға қарай іс қағаздарын, мерзімді баспасөзді, оқулықтарды, бәрін де латын әліпбиімен басып шығара бастауға тиіспіз», – деп айтқан еді.

«Тұрақтылық кепілі – қауіпсіздік» облыстық жобасы Жаңақала ауданы орталығында да жалғасын тапты Жоба аясында «Әлеуметтік мәселелердің шешілуі» бағыты бойынша кездесу ұйымдастырылып, ақпараттық түсіндіру тобы ауданымызда болды. Осыған орай Қызылоба ауылдық округінде тұрғындармен кездесу өтті. Алқалы жиынды аудан әкімінің орынбасары Айзада Шүкірғалиева жүргізіп, күн тәртібіндегі мәселені хабарлады. Жиынға денсаулық, білім, ветеринария саласының мамандары мен ардагерлер, зейнет жасына жақындаған әйелдер, жұмыссыздар және жергілікті тұрғындар қатысты.